ನಾನು 6ನೇ ತರಗತಿಗೆ ಸೇರುವ ಹೊತ್ತಿಗೆ ನಮ್ಮ ಮನೆಗೆ ರೇಡಿಯೋ ಪ್ರವೇಶವಾದದ್ದು. ನಮ್ಮ ಅಣ್ಣಂದಿರಿಗೆಲ್ಲ ಶಾಸ್ತ್ರೀಯ ಸಂಗೀತ, ಹರಿಕತೆ ಇತ್ಯಾದಿ ಇಷ್ಟವಾದರೆ ನನ್ನ ಮೊದಲ ಆಯ್ಕೆ ಚಿತ್ರಗೀತೆಗಳು. ಆಗೆಲ್ಲ ನಮಗೆ ಸಿನಿಮಾ ನೋಡುವ ಅವಕಾಶ ಸಿಗುತ್ತಿದ್ದುದು ಬೇಸಗೆ ರಜೆಯಲ್ಲಿ ನಮ್ಮ ಅಕ್ಕನ ಮನೆಗೆ ಹೋದಾಗ ಕಾರ್ಕಳದ ಜೈಹಿಂದ್ ಟಾಕೀಸಿನಲ್ಲಿ ಉತ್ತಮ ಚಿತ್ರ ಓಡುತ್ತಿದ್ದರೆ ಮಾತ್ರ. ಜೇನುಗೂಡು, ಕನ್ಯಾರತ್ನ, ಕಿತ್ತೂರು ಚೆನ್ನಮ್ಮ ಅಂಥ ಕೆಲವು ಚಿತ್ರಗಳು.
ನಾವು ನೋಡಿದ ಚಿತ್ರಗಳ ಹಾಡುಗಳು ರೇಡಿಯೋದಲ್ಲಿ ಕೇಳಿಬಂದಾಗ ಹೆಚ್ಚು ಖುಶಿ ನೀಡುತ್ತಿದ್ದವು. ಅದರಲ್ಲೂ ಸಂಭಾಷಣೆಗಳನ್ನೂ ಒಳಗೊಂಡಿದ್ದ ಯಾವುದಾದರೂ ಹಾಡಿದ್ದರೆ ಮತ್ತೆ ಆ ಸಿನಿಮಾ ನೋಡಿದ ಅನುಭವವಾಗುತ್ತಿತ್ತು. ಕಿತ್ತೂರು ಚೆನ್ನಮ್ಮ ಚಿತ್ರದ ಅಂತಹುದೇ ದೇವರು ದೇವರು ದೇವರೆಂಬುವರು ಎಂಬ ಒಂದು ಸವಾಲ್ ಜವಾಬ್ ಹಾಡು ಆಕಾಶವಾಣಿ ಬೆಂಗಳೂರು ಕೇಂದ್ರದಿಂದ ಗ್ರಾಮಸ್ಥರ ಕಾರ್ಯಕ್ರಮದಲ್ಲಿ ಆಗಾಗ ಪ್ರಸಾರವಾಗುತ್ತಿತ್ತು. ಗ್ರಾಮಫೋನ್ ತಟ್ಟೆಯ ಎರಡೂ ಬದಿಗಳನ್ನು ಆವರಿಸಿದ್ದ 6 ನಿಮಿಷದ ಈ ಹಾಡಿನಲ್ಲಿ ನರಸಿಂಹರಾಜು, ಬಾಲಕೃಷ್ಣ ಮತ್ತಿತರರ ಉತ್ತರ ಕರ್ನಾಟಕ ಶೈಲಿಯ ಸಂಭಾಷಣೆ ಆಲಿಸಿದಾಗ ನಾವು ಸಿನಿಮಾ ಟಾಕೀಸಲ್ಲೇ ಇದ್ದೇವೇನೋ ಅನ್ನಿಸುತ್ತಿತ್ತು.
ಆದರೆ ಕಾಲ ಕಳೆದಂತೆ ಈ ಹಾಡು ಯಾವ ರೇಡಿಯೊ ನಿಲಯದಿಂದಲೂ ಕೇಳಿಸದಂತಾಯಿತು. HMVಯವರು ಹಳೆ ಚಿತ್ರಗಳ ಕ್ಯಾಸೆಟ್ಟುಗಳನ್ನು ಹೊರತರಲು ಪ್ರಾರಂಭಿಸಿದಾಗ ಕಿತ್ತೂರು ಚೆನ್ನಮ್ಮ ಹಾಡುಗಳ ಕ್ಯಾಸೆಟ್ಟನ್ನು ಆಸೆಯಿಂದ ಖರೀದಿಸಿದ್ದೆ. ಆದರೆ ಈ ಹಾಡೇ ಅದರಲ್ಲಿರದಿದ್ದದ್ದು ನೋಡಿ ತುಂಬಾ ನಿರಾಸೆಯಾಗಿತ್ತು.! ಮತ್ತೊಮ್ಮೆ ದೂರದರ್ಶನದಲ್ಲಿ ಈ ಚಿತ್ರ ಪ್ರಸಾರವಾಯಿತು. ಅದರಲ್ಲೂ ಈ ಹಾಡು ಕತ್ತರಿಸಿದ್ದರು!
ಈಗ ಅಂತರ್ಜಾಲದಲ್ಲಿ ಕಿತ್ತೂರು ಚೆನ್ನಮ್ಮ ಚಿತ್ರದ ಉತ್ತಮ ಪ್ರತಿ ಇದೆ. ಅದರಲ್ಲಿ ಈ ಹಾಡೂ ಇದೆ. ಅದನ್ನು ಧ್ವನಿಮುದ್ರಿಸಿಕೊಂಡು ಭದ್ರವಾಗಿರಿಸಿಕೊಂಡಿದ್ದೇನೆ. ಈಗಲೂ ಈ ಹಾಡು ಕೇಳಿದರೆ ಪಕ್ಕದ ಕುರ್ಚಿಯಲ್ಲಿ ಕೂತು ನ್ಯಾಷನಲ್ ಎಕ್ಕೊ ರೇಡಿಯೋದಲ್ಲಿ ಇಅದನ್ನು ಕೇಳುತ್ತಿದ್ದ ದ್ರ್‍ಇಶ್ಯ ಕಣ್ಣ ಮುಂದೆ ಬರುತ್ತದೆ.
ಚಿತ್ರದಲ್ಲಿ ಮಲ್ಲಸರ್ಜನ ಹಿರಿಯ ಪುತ್ರನಾಗಿ ಅಭಿನಯಿಸಿದ ರಾಜಾ ಶಂಕರ್ ತಮ್ಮ ಮಿತ್ರರಾದ ನರಸಿಂಹರಾಜು ಮತ್ತು ಬಾಲಕೃಷ್ಣ ಅವರೊಡನೆ ಪಕ್ಕದೂರಿನ ದೇಸಾಯರು ಆಯೋಜಿಸಿದ್ದ ಸವಾಲ್ ಜವಾಬ್ ಕಾರ್ಯಕ್ರಮದಲ್ಲಿ ದೇಸಾಯರ ಪುತ್ರಿ ಲೀಲಾವತಿ ಎಸೆಯುವ ಸವಾಲುಗಳಿಗೆ ಸವಾಲುಗಳ ರೂಪದಲ್ಲೇ ಜವಾಬು ಕೊಡುತ್ತಾರೆ. ನರಸಿಂಹರಾಜು ಮತ್ತು ಬಾಲಕೃಷ್ಣ ಕೂಡ ಒಂದು ಸವಾಲಿಗೆ ಜವಾಬು ಕೊಡುವ ಪ್ರಯತ್ನ ಮಾಡುತ್ತಾರೆ.
ಎಸ್. ಜಾನಕಿ, ಜೆ.ವಿ.ರಾಘವುಲು, ರುದ್ರಪ್ಪ ಮತ್ತಿತರರು ಹಾಡಿದ್ದ ಈ ಹಾಡಿಗೆ ಪಿ.ಬಿ.ಶ್ರೀನಿವಾಸ್ ಅವರ ಕೊಂಚ ಅನುನಾಸಿಕ ಧ್ವನಿ ವಿಶೇಷ ಮೆರುಗು ನೀಡಿದೆ. ಚೌಡಕಿ, ತಮ್ಮಟೆ, ತಬ್ಲಾ, ಢೋಲಕ್, ಮೋರ್ ಸಿಂಗ್ ಮುಂತಾದ ವಿವಿಧ ತಾಳವಾದ್ಯಗಳನ್ನು ಒಳಗೊಂಡ ಇದರಲ್ಲಿ ಮಹಾರಾಷ್ಟ್ರದ ಢೋಲಕಿಯ ಆಕರ್ಷಕ ನುಡಿತವಿದೆ. ಚಿತ್ರಗೀತೆಗಳಲ್ಲಿ ಸಾಮಾನ್ಯವಾಗಿರುವ ವಯಲಿನ್, ಕೊಳಲು, ಮ್ಯಾಂಡೊಲಿನ್, ಕ್ಲಾರಿನೆಟ್ ಮುಂತಾದ ವಾದ್ಯಗಳ ಯಾವುದೇ interlude ಈ ಹಾಡಿನಲ್ಲಿ ಇಲ್ಲದಿರುವುದನ್ನು ಗಮನಿಸಬಹುದು.
ಈಗ ರೇಡಿಯೋ ನಿಲಯದವರು ಮರೆತಿರುವ ಈ ಹಾಡು ನಿಮಗಾಗಿ ಇಲ್ಲಿದೆ.
ದೇವರು ದೇವರು ದೇವರೆಂಬುವರು
ದೇವರೆಲ್ಲಿಹನೆಂದು ಯಾರು ತೋರಿಸರು
ಏನೇನೊ ಕಟ್ಟು ಕಥೆ ಹೇಳಿ ಹೋಗುವರು
ನನ್ನಂತೆ ಕೋಟಿ ಜನ ಪ್ರಶ್ನೆ ಕೇಳುವರು
ಸಂದೇಹ ನೀಗುವರು ಮುಂದೆ ಬರ್ರಣ್ಣ
ಸಂದೇಹ ನೀಗುವರು ಮುಂದೆ ಬರ್ರಣ್ಣ
ಜವಾಬ್ ಕೋಡೋರು ಯಾರಾದ್ರೂ ಮುಂದೆ ಬರ್ರಪ್ಪಾ.
ಸೂರ್ಯ ಚಂದ್ರರ ಚಲನ ನಿಲ್ಲೆಂದು ಹೇಳಿ ಬಾ
ಸಾಗರ ಮಧ್ಯದ ನದಿ ನೀರನು ನೀನೆತ್ತಿ ಬಾ
ಮಲ್ಲಿಗೆ ಹೂವಿನ ಕಂಪನು ನೀನು ಮುಟ್ಟಿ ಬಾ
ನಿನ್ನ ದೇವರ ನಿನಗೆ ತಂದು ತೋರುವೆನು ತೋರುವೆನು
ಮಗಳೇ, ನೀನೂ ಅವರಿಗೊಂದು ಸವಾಲು ಹಾಕವ್ವಾ.
ನಾ ನೀರಲಿರುವಾಗ ನನಗೆ ಮಿತ್ರ
ನಾ ನೀರ ಮೇಲೆ ಬರೆ ನನಗೆ ಶತ್ರು
ಹಗಲೆಲ್ಲ ನಗುವಿನಲಿ ತೇಲಿಸುವನು
ಮೊಗ ಮುಚ್ಚಿ ಇರುಳೆಲ್ಲ ಅಳುವೆ ನಾನು
ನಾನಾರು ಅವನಾರು ಹೇಳೊ ಜಾಣ
ನಾನಾರೋ ಅವನಾರೊ ಹೇಳೊ ಜಾಣ
ಮಗಳ ಸವಾಲಿಗೆ ಏನು ಉತ್ತರ ಹೇಳ್ತಿಯಪ್ಪಾ?
ನಿನ್ನಂತೆ ಮೊಗವಿರುವುದೊಂದು ಹೂವು
ಆ ಹೂವ ದಳದಂತೆ ನಿನ್ನ ಕಣ್ಣು
ನೀರಿನಲಿ ನೇಸರನು ಅದಕೆ ಮಿತ್ರ
ನೀರ ಹೊರಗಿರೆ ಅವನೆ ಅದಕೆ ಶತ್ರು
ಕಮಲೆ ಎನ್ನುವ ಹೆಸರು ನಿನಗೆ ಗೊತ್ತೇ
ಕಮಲೆ ಎನ್ನುವ ಹೆಸರು ನಿನಗೆ ಗೊತ್ತೇ
ಗೊತ್ತು...
ಆಂ... ಇದೇನು ಹೇಳಿ ನೋಡೋಣ.
ಹೇಳಿ ನೋಡೋಣ.
ಕಣ್ಣಿಲ್ಲ ಕಾಲಿಲ್ಲ ಆದರೂ ಚಲಿಸುತಿದೆ
ಕೊಳ್ಳಲದು ಸಿಗದು ಕಾಣಲದು ಬರದು
ಬೆಲೆಕಟ್ಟದಾ ಒಡವೆ ಎಲ್ಲರಲ್ಲಿಹುದು
ಯಾವುದು ಎಲ್ಲಿದೆ ಬಲ್ಲಿದವ ಹೇಳಲ್ಲ
ಯಾವುದು ಎಲ್ಲಿದೆ ಬಲ್ಲಿದವ ಹೇಳಲ್ಲ
ಅದಕ್ಕೆ ಅವರನ್ನೇನ್ ಕೇಳ್ತೀರ್ರೀ?
ನಾನಿಲ್ವೇ ಮಹಾನುಭವಿ ಹೇಳ್ತೀನಿ ಕೇಳ್ರೆಲ್ಲ.
ಉಂಡ ಕೂಡಲೇ ಉಬ್ಬಿ ಬೋಟಾಳೆ ಮಾಡುವದು
ಹಸಿವಿನೊಂದಿಗೆ ಕುಣಿದು ತಾಳ ಹಾಕುವದು
ಹಾಲೂಟ ಹೋಳಿಗೆಗೆ ಹಗಲೆಲ್ಲ ಕಾಯುವದು
ಹುಟ್ಟಿನೊಂದಿಗೆ ಬೆನ್ನಿಗಂಟಿ ಬಂದಿಹುದು
ಹೊಟ್ಟೆ ಹೊಟ್ಟೆ ಹೊಟ್ಟೆ
ಏ ಹೋಟ್ಯಲ್ಲೋ.
ಆಳು ಅರಸನ ಕಣ್ಣ ಬಾಚಿ ತಬ್ಬುವುದು
ಮುಳ್ಳು ಹಾಸಿಗೆ ಒಂದೂ ಲೆಕ್ಕಕೆ ತರದು
ಎಚ್ಚರಿಕೆ ತಪ್ಪಲದು ಗೊರಕೆ ಹೊಡೆಯುವುದು
ಸ್ವಚ್ಛಮನದವರೊಡನೆ ಸರಸವಾಡುವುದು ನಿದ್ದೆ
ನಿದ್ದೆ ನಿದ್ದೆ ನಿದ್ದೆ
ಇವರೆಲ್ಲೋ ಊಟ ನಿದ್ದೆಗಳಲ್ಲಿ ರಸಿಕರೆಂದು ತೋರುತ್ತದೆ.
ಏಕೆ, ಸೋತು ಹೋದರೇನು?
ಊಂ.. ಸೋಲು?
ನನ್ನಲ್ಲಿ ನಿನ್ನಲ್ಲಿ ಎಲ್ಲರಲ್ಲಿಹುದು
ಒಂದೇ ಹೆಸರಿನ ಒಡವೆ ರೂಪ ಹಲವು
ಮಾನವನ ದೇವತೆಯ ಮಾಡುವುದು ಕೆಲವು
ವಿಶ್ವಸೃಷ್ಟಿಯ ನಿಲುವೆ ಪ್ರೇಮಮಯವು
ವಿಶ್ವಸೃಷ್ಟಿಯ ನಿಲುವೆ ಪ್ರೇಮಮಯವು
